Pa Valdir Alves y tudu Benfikistas, inkluindu k’es ki sta na Lua y Marte
 

Benfika Trupika

By Dr. Azágua

Sima baga-baga

Es pidi-nu praga

Pa du perde na Braga

Y ki praga!

Ditu fêtu!…

Nada ka saí drêtu!

Krédu! Krédu!

                                                                                                Ka ponta-nu dédu!                            

Inda sta sédu

Pur isu du ka sta ku médu!

Dôs a zéru

N’un tárdi dizuspéru

Sen ágia na pêtu

Tudu fêtu sen ruspêtu…

Pablo Aimar

Staba mutu divagar

y xei d'azar;

Di Maria ku mania

Nun tardi di bazofaria

Cardozo

Un ôtu prigisozu

Ku fráku pontapé

El mestêba más dôs pé;

El bá pa rua

di forma krua

Pamó dje’l stá na lua…

Saviola konxêdu pa rabentóla

Stába sima vióla

Ku kórda rabentadu

Dentu kanpu disnortiadu.

Jogu foi mêsmu difísil;

Na minutu-séti

Nu faze nôti-séti;

Golu di Hugo Viana

Entra sima un mísil

Ki tra-nu tudu gana!

La na Nórti

Braga foi más fórti;

Okay!!!

Djâ du konvense

Ma nu ka fórti sima brakarense,

Okay???!

Djâ du konvense

Ma Braga vense

Y es konvense!

Common sense!